كيف تطور نفسك في مجال الكتابه - ازاي تحسن من مستواك في كتابه الشعر، الاسكريبت، القصص القصيرة

بقلم محمد رفيق- من قصص اعضاء زي الكتاب ما قال

إسكريبت (محمد وهبة)

-لو سمحت
=انا؟؟!!
-ايوة انت
=اتفضلي يا أنسة
-انا مش أنسة
=اسف.... اتفضلي يا مدام
-انا مش مدام
=افندم؟!!! امال حضرتك تبقي مين
-انا هبة
=ايه ده حقيقي فعلا!!!! وانا مال امي انا
-ايه ده انت بتعلي صوتك عليا ليه
=استغفر الله العظيم يارب
-وكمان بتدعي عليا
=بدعي عليكي ايه يا بت انتي هو انا اعرفك
-نتعرف..... ايه مالك بتبصلي كدة ليه
=انتي حد زقك عليا يا بت انتي مش كدة
-حد؟؟؟!!!! حد زي مين يعني
=ندي؟؟؟!!!
-ندي مين دي؟!
=اللي كنت مرتبط بيها زمان
-وانت كنت فاكر ندي اللي مرتبط بيها زمان ليه ان شاء الله
=مش فاكرها بس.....
-امال مال وشك قلب كدة لما قلت اسمها
=وشي قلب فعلا
-اه ضرب الوان اهو.... ايه ده ايه ده وكمان متوتر
=لا طبعا انا مش متوتر خالص وبعدين انتي مالك اصلا
-حد قالك قبل كدة انك حد قليل الذوق
=حد قالك انتي قبل كدة انك حد اهبل وطقة منك عالأخر
-احترم نفسك وشوف انت بتكلم مين
=هكون بكلم مين يعني
-انا هبة
=يووووه...... انا مش فاضي للهبل ده انا ورايا شغل
-هتتأخر؟
=مش عارف علي حسب الظروف
-طب استني استني
=ايه تاني
-هشوفك تاني امته
=هخلص علي الساعة 7
-خلاص هنتقابل 8.... سلام
=يا انسة يا انسة
-يووووه ما قولتلك هبه
=طب يا هبة مقولتيش المكان اللي هنتقابل فيه

*وضحكت هبة علي ابتسامته اللي كانت شبه الاطفال ومليته عنوان الكافيه اللي تقريبا مفوتوش يوم بعدها الا وقعدوا فيه*

=صباح الخير
-اهلا
=ايه ده مال وشك عالصبح
-مفيش
=طب الحمدلله
-هو ايه اصله ده.... مش هتقعد تتحايل عليا بقاااا و أقعد أقلك مفيش لحد ما اخرجك عن شعورك وتزعقلي وانا ازعل منك وامشي واسيبك والناس تتفرج عليا
=طب ماانتي عارفة المسلسل هو لازم يعني نعيده
-لا بس الاهتمام مبيطلبش
=اااه شكلها طالبة معاكي نكد يا هبة
-اه طالبة معايا نكد يا محمد وبعدين مين دي اللي علقتلها بقلب احمر امبارح؟!!!
=دي سمر زميلتي في الشركة
-وزميلتك في الشركة تحطلها قلب احمر ليه يا حنين
=و مال القلب الاحمر
-ياسلام ما معروفة يا اخويا القلب الاحمر للمرتبطين والازرق للصحاب
=طب والاخضر والبرتقاني
-الاخضر للEX والبؤتقاني لزميلتي يا بتاع زميلتي
=اااه يا مفترية ايدك ناشفة
-متحطش قلوب تاني من اي لون يا محمد
=حاضر
-ومتردش علي تعليقات بنات
=حاضر
-واعمل ل سمر بلوك
=حاضر.... مش عايزاني امسح الحساب بالمرة
-انت بتتريق عليا؟!!!
=لاااا اتريق عليكي أيه...... جارسون

*فضلوا محمد وهبة تقريبا علي نفس النمط ده انهم صحاب لدرجة ارتباطهم ببعض مكنوش عارفين يحطوا عنوان ثابت للي هما فيه.... سكاعة التليفون متقفلتش الا لما واحد فيهم ينام قبل التاني والتاني يقفل بقي روتين معتاد دايما وفضلوا عالحال ده لحد ما جه عيد ميلاد هبة واللي اصر فيه انهم يعملوه في النادي وسط صحابهم *

-ايه يا محمد مالك
=ايه مالي يا هبة
-انت مش شايف وشك عامل ازاي
=عجبك هديتي
-محمد انت بتوه في الموضوع؟
=شوفتيها؟؟؟!
-محمد!!!!
=الواد الملزق اللب كنتي واقفة معااه ده
-واد؟! واد مين ده
=هبة متستهبليش الواد اللي مسك ايديكي واحنا بنطفي الشمع
-اااه ده عمرو ابن خالي
=وعمرو ابن خالك ليه محلل ده انا نفسي ممسكتش ايدك الا وانا بعديكي من العربيات تقولي ابن خالي
-ايوة لانك صحبي انما هو ابن خالي
=صاحبك!!!! هبة انتي بتضحكي علي نفسك انتي عارفه كويس ان اللي بيني وبينك مش مجرد صداقة بريئة
-بس احنا اتفقنا
=الحاجات اللي زي دي مبتلتزمش بإتفاقات يا هبة
-محمد انا.......
=انا مروح يا هبة
-طب مش هنفتح الهدية
=افتحيها لما تروحي البيت

*سابها تقريبا وخلاها تفكر طول الوقت لحد ما فتحت الهدية ولقيت فيها خاتم وورقة مكتوب فيها (تتجوزيني؟) لحد ما هي ابتسمت ودمعت وتضحك بصوت عالي مقدرتش تحبس دموعها لحد ما التليفون رن جمبها *

-محمد
=بحبك
-محمد!
=تتجوزيني
-محمد!
=ايه اللي محمد محمد انتي بتحفظي اسمي
-محمد الخاتم مش علي مقاسي
=اعمل ايه انا في ايد الاطفال بتاعتك دي
-محمد اتصرف
=خلاص بكرة نغيره
-ايوة بكرة نغيره
=تصبحي علي خير يا انسة
-انا مش انسة
=خلاص تصبحي علي خير يا مدام محمد الشواربي
-انا مش مدام
امال انتي ايه يا روح ماما
-انا هبة

*وامتزجت ضحكتهم*

والنهاردة

هبة بقت حرم البشمهندس محمد الشواربي والصغنن ده ادم واخوه
والتوأم ياسين 💜

تأليف: #محمد_رفيق