كيف تطور نفسك في مجال الكتابه - ازاي تحسن من مستواك في كتابه الشعر، الاسكريبت، القصص القصيرة

 الروائية دينا أسامة في ضيافة الصحفية حمدية عبدالهادي ولقاء في مجلة زي الكتاب ما قال

"من رحم الطموح تخلق الشهرة ، ومن سنفونية الكلمات تنطلق الخبرة ، لا داعي للقلق إن كانت الوسيلة بحر من الثقافة جاريا، 'دينا أسامة ' كاتبة في مرحلة الإشراق تتغذي كلماتها من واقع العلاقات ، وتصطدم رواياتها بسور العادات وتتمرد عباراتها لحل المشاكل والانقسام والهفوات ، لتخط بواقع قلم الروايات ثلاثة قصص مع الاختلاف فى الموضوعات مابين" صرخة قلب ، ورحلة غرام ، وبالقدر نلتقي " ، ابنة الفيوم ، صاحبة ال ١٦ تبدع في التحليق في سماء الروايات . - دينا إيه هي هوايتك المفضلة ؟

=هي ف الحقيقه مش هواية واحدة لا ، أنا في أوقات فراغي بحب أقرأ وأغني واكتب وأصمم فديوز لناس بحبها وكمان بحب التسوق أوي، إني أنزل أشتري حاجات ليا بس حالياً بقت الكتابة هي هوايتي المفضلة أو أكتر حاجة أكيد بعملها. -ايه هو السبب الا دفعك للكتابة بشكل أعمق؟ =هتستغربي أوي إيه اللي دفعني لكده.! أنا من وأنا طفله وأنا بحب الشهره، أحب الأضواء وحياة الفنانين والمُطربين وكنت دايماً كل ما أشوف مطرب أو ممثل بمهرجان والاقي حشد من الناس حواليه وعاوزين يتصوروا معاه وقد إيه الناس محترمينهم ومعروفين وحاجه ولا ف الخيال كده، كنت بتخيل نفسي اوي مكانهم لدرجه اني زهقت أصحابي وأهلي وكنت كل ثانيتين اقولهم، أنا عاوزه ابقي ممثله، لأ انا عاوزه أبقى مطربه!. يعني كنت عاوزه أكون مشهوره وخلاص ومش شرط إيه المجال، ومبدئياً أنا بحب الكتابة أوي من وأنا طفله، كنت دايماً أكتب حاجات خياليه ف نوتس صغيره من تأليفي بس ما اهتمتش بده والسنين جرت لحد ما بقيت ف تالته إعدادي ولقيت صحابي بيقرأو روايات وعرفت ف الفتره دي قد إيه الروايات بقيت شئ أساسي وأن الكل بيقرأ وعارف أسماء الكُتاب، ف قولت أقرأ انا كمان من الروايات دي وفعلاً أول رواية قرأتها كانت إسمها أحببتها ف انتقامي، روايه عيشتها بكل احداثها وتفاصيلها ولحد الان مش قادره أنساها وهتفضل روايتي المفضلة وبحيي الكاتبه عليها وجيت وأنا بأولى ثانوي وأنا قاعدة بذاكر كميا كانت الساعه ٣ و١٣ دقيقه بالظبط، لقيت فكره جات ف دماغي مره واحده وتنفع اوي كروايه مع إضافه بعض الحبكات واللمسات فيها وهتبقى تمام اوي، اتشجعت اوي وقولت الله عليا ده انا بعرف اقلف اهو انا كمان ولو كتبت هبقي روائيه معروفه ومشهوره وهحقق حلمي، جيت بنفس اليوم نزلت بكذا جروب للروايات بعد ما عملت خلاص تصميم للروايه واختارت اسمها، نزلت وقولتلهم فكرتها وبعض الحاجات فيها ومنتظره بقى عاوزه اشوف هما حابيني انزل ومتحمسين ولا، وفعلاً بجد لقيت كم ناس علقت وأنهم لأ نزليها بسرعه.. دي كانت حاجه كفيله انها تخليني سعيده ومن ساعتيها وانا بكمل كتابه علشان أحقق حلمي حتى لو بالمجال ده بالاضافه إنه مجال مُفضل ومُقرب لقلبي من وانا طفله ف ده اللي مخليني اكمل وانا مرتاحه اني بعمل حاجه بحبها.

-اسم الرواية ايه ؟ =صرخه قلب. - فكرتها إيه وهل حابة إنها تبقي كتاب ورقي؟ =مبدئياً هي تُعتبر صعيدية، وبتدور ف إطار رومانسي حزين، عن البطله اللي اسمها تمارا أبو اليزيد والبطل أمجد النازلي. تمارا بتدرس بكلية الألسن بمحافظتها الصعيديه وامجد خريج كليه الحقوق وبقي وكيل نيابه، ف يوم تمارا دي هتقرر تكمل اخر سنه ليها بتعليمها بنفس محافظة البطل اللي هو أمجد.. وبعدها هيتعرفوا ع بعض وبلاش بقى لحد كده علشان محرقش.! وفعلاً فعلاً دي أول روايه ليا واقرب روايه لقلبي ف التلاته اللي كتبتهم واكيد لما تُتاح ليا الفرصه اني انزل ورقي، اكيد بدون تردد صرخه قلب بأجزائها التلاته هنزلها مع تعديل السرد بشكل كلي وحذف بعض المشاهد واضافه مشاهد جديده.. لكن هتكون نفس الفكره ان شاء الله ي رب. -هل فكرة الرواية مستمدة من واقع شخصيات حقيقية ؟ = لا ف الحقيقه الرواية من وحي خيالي العميق مش أكتر وأكيد كان فيها بعض الأحداث اللي بتحصل ف كل بيت مصري عادي - طب هل بتشوفي أنك عندك القدرة تكتبي في أي نوع سواء رومانسي درامي أو كوميدي أو مقالات مثلا؟ =آه الحمد لله أعرف أكتب أي نوع، بس بحس كده ف بعض الأحيان أو من خلال رأي المتابعين اني متمكنه ف الرومانسي اكتر، آه ممكن أكون متمكنه في كتابته ثنه عن الباقي رغم إني مش رومانسية اصلا، أنا شخص غامض اوي.! -من وجهة نظرك هل الكاتب قادر علي الإبداع واكتشاف جوانب خفية في الانسان؟ = طبعاً قادر ومش الكاتب بس علفكرا.! ، عموماً أي شخص ف أي مجال قادر ع الإبداع، طالما جوانا طاقه إيجابية. - بتحبي القراءة ولا بتميلي للكتابة فقط؟

=بحب الاتنين وطبيعي الكتابة مرتبطة بالقراءة دايماً، يعني الكاتب لازم يكون بيقرأ وبيحب القراءة، وأنا بحب أقرأ وأكتب بس حالياً بكتب بس. -مين هو كاتبك المفضل ؟ = د/حنان لاشين وخوله حمدي وعمرو عبد الحميد. -من وجهة نظرك أزاي الكاتب يقدر يوصل لأكبر فئة من القراء ؟ = من خلال إظهار نفسه ع السوشيال بشكل دائم وأنه يكون موجود بجميع جروبات الروايات ويعرف يروج لنفسه كويس اوي ويشهر نفسه، ف حاجات كتيره تقدر تخلي الكاتب ينمي من نفسه والناس تعرفه، ف تطبيق وتباد وف زي ما قولت جروبات فيس وف جروبات واتس وتليجرام، ده كله لما يعمله ويكون acttiv علطول ع السوشيال واكيد طبعاً القُراء بينجذبوا لمحتوي الروايه اللي انتي بتقدميها من وصفها لمقدمتها لكل شئ ده أكبر عامل اكيد، ويكون الكاتب بيكتب كتير وينزل بحيث ان محدش ينساه ويكونوا عارفينه ف ده بيساعد برضو. -هل السوشال ميديا قدرت توصل الكاتب بالجمهور أسرع؟ =طبعاً طبعاً السوشيال دلوقتي بقت الأساس، حياتنا دلوقتي بقت كلها سوشيال، السوشيال قريت المسافات وعرفت ناس ع ناس وهي فعلاً أقوى عامل لنجاح الكاتب. - دنيا أسامة شايفة نفسها وصلت لفين في مجال الكتابة ؟ =ف الحقيقه انا لسه ببتدي ولسه ف بداية الطريق ف مش هقدر أقول أنا إيه ف الروايات أو وصلت لأيه!. أنا لسه خالص موصلتش للحاجه اللي اتمنيتها أو حطيت عيني عليها من زمان وبسعي لده وف يوم من الأيام أن شاء الله هقدر أقول أنا وصلت كل اللي أقدر أقوله إني بس فخوره بنفسي إني اتقدمت لخطوه زي دي وتُعتبر نقله كبيرة ف حياتي بجد ومبسوطه بيها -وهل بتواجهك صعوبة في ذلك المجال؟ أي كاتب بتواجه صعوبه ف بدايه الطريق وأنا علشان بعتبر نفسي لسه بادئه ف آه أنا بقابل صعوبة بس الحمد لله بتغلب عليها، وطبيعي ف حياه أي كاتب سواء كبير أو لسه مبتدأ، بيقابله صعوبات كبيره، ف بيقدر يتغلب عليها ويقاوم ويكمل وف لأ. -ومين أكبر داعم لكِ؟ =أهلي أكيد، ماما وبابا وأخواتي وبعض أصدقائي اللُطاف،، وبوعدهم إني هكون مصدر فخر ليهم دايماً وهرفع راسهم . -هل الكتابة وسيلة لإخراج قصص مكبوتة بداخلنا أم أنها ترويح عن الملل؟ =الاتنين، بالنسبه لناس بتكون ترويح عن الملل فقط واشغال وقت فراغهم بالكتابه فقط وبالنسبه لناس تانيه وانا منهم الاتنين، أنا ف اوقات فراغي أفضل إني اشغله بالكتابة مش علشان وقت فراغ بس، لأ انا روايتي الاخيره دي الحمد لله قريبه من الواقع بأحداثها العائليه والمشاكل وكل ده، أنا بحب أكتب النوع ده، أكتب حاجة تبقى واقعيه ومش خياليه اوفر رغم إني شخص خيالي لأبعد الحدود. - واي هو طموحك في الحياة عامة؟ =طموحي إني أحقق حلم بابا وماما وأنهم يكونوا فخورين بيا وانا بالمجال اللي يشرفهم وأشوف إبتسامه الفخر ف عنيهم بس. -ونفسك توصلي لأيه ؟ = زي ما قولت فوق، نفسي اكون مشهوره بجنون -ولو حابة توجهي شكر هيكون لمين ؟ =أوجه شكر لعيلتي الجميله واصحابي المقربين ومعرفه السوشيال القمر اللي كانت الطف ناس عرفتها وبجد شجعوني وحبوني من قلبهم، حابه اقولكم شكراً ليكم اوي والله ودايماً اكون عند حسن ظنكم. -وهل بتشوفي أن النشر الإلكتروني كافي أم للورقي هيبة لم تزول بعد حتي مع انتشار النشر الإلكتروني وسهولته؟ =طبعاً مش هننكر ان النشر الإلكتروني لازم ولا بُد ف بدايه الكاتب، اومال هو هيتعرف منين ويبقى ليه متابعين وجمهور وراه اللي لو فكر ينزل ورقي يبقوا منتظرينه بشغف. يعني انا من وجهه نظري لازم نشر إلكتروني أولاً واكيد طبعاً الورقي بعدين. - وهل الكاتب من حقه الحصول علي بعض المستحقات المالية من برامج النشر أم انه يكتفي بإخراج أعماله للنور؟ = بالنسبه ليا انا مبفكرش ف مادايات خالص ولا بفكر اني انشر روايتي ع مواقع تجيبلي فلوس والكلام ده، اهم حاجه عندي ومقتنعه بيها إني اكتب وانشر واتعرف كفايه وبعدين بقي حكايه الفلوس دي بس مش شرط. - ايه هي الحاجة الا ممكن تخليكي تتخلي عن الكتابة؟ = تعليمي لو اكيد خيروني ما بين الاتنين، اكيد بلا مُنازع الكتابه خسرانه قصادها، مستقبلي وتعليمي اهم عندي من كنوز الدنيا. - نفسك تكوني إيه؟

= امممم!! مفيش حاجه ف دماغي مُعينه بصراحه بس اكيد الشخص بيبقى عايز يكون فوق وف أعلى مكانه اي ان كانت إيه..وانا راضيه باللي ربنا كاتبهولي واكيد هيبقى الأفضل ليا. -هل استمتعتي بالحوار؟ = فوق ما تتصوري، اتشرفت بيكي جدا