مراتي بالعامية بقلم محمد حداد
كان قبل الجواز بينا حب كبير وواخدين علي بعض جامد وخصوصا اننا اخدنا فتره قبل الجواز مكتوب كتابنا فكنا بنهزر ونضحك وتشتكيلي وتحكيلي ادق تفاصيلها حتي اللي مش بتحكيها لتفسها...
المهم بعد اول يوم جوازنا حسيتها وحده تاني معرفهاش! تاني يوم وجم اهلنا يزرونا هي حسيتها صاحية ومرعوبة مني مش عايزة تكلمني او بتكلمني من بعيد وبتقولي قوم اهلك جم بره ولقيتها اخدت هدومها ودخلت غيرت في الحمام وخرجت بتهزر وتضحك مع أهلي وحسيتها مبسوطة او مطمنه بوجودهم! وكل ما يمشوا تمسك فيهم انا حسيت إنها مش عايزة نكون وحدنا. المهم مشيو هي دخلت حضرتلنا اكل وانا باكل وهي بتلعب في الرز زي العيال ومش بتاكل.
كنت بفتكر اما كنت بكلمها الصبح أسألها بتعملي ايه تقول باكل، بعد شويه بتعملي ايه باكل راحه فين راحه اكل واهي لينا يومين تقريبا مكلتش حاجه خالص .
كانت تقولي ديما هحضنك ونلعب واتنطط في حضنك انا بمد ايدي اخد او اديها الحاجه احسها بتاخدها باطراف صوابعها من بعيد مش عايزة تلمسني وخايفه ومرعوبه ديما.
حتي واحنا نايمين كنت بقوم في نص الليل اقوم الاقيها صاحية وباصه للسقف وساعات بتعيط اجي اكلمها احاول احضنها الاقيها متردد من بين عايزه احضنها وما بين اللي هو كاشه مني كده
بقيت محتار اعمل ايه ؟! وبسالها وتقول مفيش .
جيت في يوم قولت نغير جو البيت اخدتها وعزمتها نتعشي بره بالفعل لقيتها بتاكل طبيعي واكلت بطريقه رهيبه يعني اللهم لا حسد 
جبتلها ورده كده ضحكت واخدتها باريحيه وحب سالتها مالك؟! انتي مش بتحبيني مش عايزاني طيب ؟!
ببص لقيتها بتعيط؛ لا أنا بحبك اوي وانت عارف وبدات تشرحلي حاجات حسيت اني غبي ازاي مفهمتهاش! قالت انا بقيت حاسه في عالم تاني غير عالم متربيه فيه بقالي عشرين سنه بصحي علي حد غير اخواتي وامي وابويا بنام في فرشه غير فرشتي باكل مش حاسه ده بيتي اللي ادخل اخد اللي عايزاه في اي وقت انت فاهمني .
حطيت ايدي علي خدها وحسيتها ارتاحت اما حسيت اني فاهمها، وقولتلها اكيد يا حبيبي بس اعرفي انه ده بيتك الاساسي وده مكانك امك زي ما بتشوفيها كانت ماسكه بيتكم فانتي هتمسكي بيتك وروحنا حسيتها مطمنه دخلت وانا قولتلها نازل تحت بحجه انها تغير وتاخد راحتها ونزلت جبتلها حبة شكولاتات ومصاص من اللي بتحبهم وجيت كده اول ما شافتهم جات طايرة عندي ولقيتها جنبي ومش خايفه وتاني يوم روحت جبت ملايه نفس لون اللي كانت بتفرشها علي سريرها وفرشتها هي ضحكت وافتكرت انها هي ولقيتها نامت مطمنه وبقيت اخدها واكلها بايدي واقولها مش هاكل غير لو كلتي واتعودت علي حياتنا دلوقتي الحمدلله لا لحقت معلقة رز لاما نمت جعان حتي مش بتعزم عليا الف هنا علي قلبها
الفكرة انك كراجل لازم تفهم انك من اول يوم تحتويها وتعرف انها غيرت حياتها وداخله حياه جديده متطلبش منها كل حاجة مرة وحده لحد ما تتعود وانت هتقول يا ريتها ما اتعودت
ربنا يسعد الجميع يا ربملحوظه: لسه مجوزتش ولكن حكايات من الواقع
محمد_حداد
تعليقات
إرسال تعليق
اكتب تعليق لتشجيعنا