كيف تطور نفسك في مجال الكتابه - ازاي تحسن من مستواك في كتابه الشعر، الاسكريبت، القصص القصيرة

 

سؤال لماذا سميت سورة البقرة بسورة البقرة؟ وما هو سر سورة البقرة ؟ بقلم امل محمد

كنت بحفظ سورة البقرة الربع الرابع ووقفت عند الآية: "بقرة صفراء فاقع لونها تسر الناظرين" _ وقفت عند الآية وفى سؤالين جم فى بالى، والسؤال الأول دايما كان يجى فى بالى كل أما أراجع سورة البقرة.. الأول: هى ليه سورة البقرة اسمها كده..؟ الثانى : ايه علاقة مواضيع سورة البقرة ببعضها، يعنى ربنا سبحانه وتعالى بيتكلم فيها فى مواضيع كتير، ايه علاقة المواضيع دى كلها ببعضها..؟ ••••••••••••••••••• كملت باقى الربع مراجعة وقفلت مصحفى وروحت للكتاب... ومن حسن حظى كان النهاردة يوم حلقة التجويد ( اليوم ده لو حد عنده سؤال بنسأله للشيخ ، الشيخ فرج وكمان بنأخد فيه أحكام وهكذا) سرى اليوم كالمعتاد وسمعنا وخلصنا وبدأت حلقة التجويد.. _ الشيخ فرج : هاا يا ترى فى أسئلة ولا هنبدأ علطول.. _ أمل رفعت ايديها وقالت : عندى سؤالين.. _ الشيخ فرج: أحب اسمعهم _أمل : أول سؤال : ليه سورة البقرة سمية بهذا الاسم.. _الشيخ فرج : اممم، وتانى سؤال ...؟ لقيت الشيخ بيردد معايا السؤال : ايه علاقة مواضيع سورة البقرة ببعضها _الشيخ فرج: متستغربيش ، أصل السؤالين دول كانوا فى خاطرى وأنا صغير وسألت شيخى فيهم _ أمل: طب وايه الاجابة، لان السؤالين دول بيلزومونى كل أما اقرأ سورة البقرة _الشيخ فرج : سورة البقرة من أكثر السور القرآنية اللى المستشرقين خدوا عليها مطاعن، كانوا بيقولوا سورة 286آية و49 صفحة، أنت مش عارف أنت طالع منين وداخل فين.. وكل شوية الموضوع يتغير.. بل لدرجة إن بعض كبار علماء التفسير قال سورة البقرة لا يوجد ترابط بين آياتها، فهى سورة كلها أحكام . وظهر فريق آخر من العلماء ردوا على المستشرقين أن مفيش كلمة فى القرآن مالهاش حكمة، بل كل كلمة ليها حكمة وترابط مع غيرها لإن ده كلام ربنا سبحانه وتعالى... _أمل: مش فهمت بردوا يا شيخنا ايه علاقة ده بالسؤال.. _الشيخ فرج: اصبرى على رزقك يا بنيتى دى مجرد مقدمة أو معرفة ليكم بس يا أولادى _ أما إجابة السؤال الأول وهو سبب التسمية... واحد من بنى اسرائيل قتل واحد تانى ومكنوش عارفين مين اللى قتله، راحوا لسيدنا موسى -بصفته النبى- وسألوه _من القاتل ف ربنا رد على سيدنا موسى بأمر ذبح البقرة الصفراء عشان كده هما ردوا بعدها "اتتخذنا هزوا" 《يعنى احنا بنقولك مين اللى قتل الراجل تقولنا ادبحوا بقرة...!》 وقعدوا يماطلوا كعادة بنى اسرائيل، وبعد ما ذبحوا البقرة، ربنا أمرهم يضربوا الشخص المقتول بعظم البقرة الصفراء المذبوحة ، ولما عملوا كده الشخص قام بعد موت وقال مين اللى قتله.. "فقلنا اضربوه ببعضها كذلك يحي الله الموتى ويريكم آياته لعلكم تعقلون " _أمل :يعنى القصة كلها عن معجزة تبين قدرة الله تعالى وانه لا يستحيل عليه شئ... _الشيخ فرج: بالظبط كده... _ الشيخ فرج: ننتقل لإجابة السؤال الثاني: باختصار هنحاول نربط الآيات ببعضها فى إيجاز. سورة البقرة جزءيين الجزء الأول عبارة عن تلت قصص ل تلت خلفاء في الأرض. _الخليفة الأول هو سيدنا آدم "إنى جاعل فى الأرض خليفة" ربنا كلفه تكليف وكانت النتيجة إنه عصى ثم أطاع وجاب 50% فى التكليف "وعصى آدم ربه فتوى" ••••••••••••••••••• _الخليفة الثاني بنى اسرائيل "ولقد اخترناهم على علم على العالمين" ربنا كلفهم تكليف،كانت النتيجة0% مسابوش معصية فى حق الله إلا مفعولها. ••••••••••••••••••• _الخليفة الثالث إبراهيم عليه السلام "إنى جاعلك للناس إماما" كانت النتيجة 100% وأطاع تمام الطاعة. ••••••••••••••••••• الجزء الثاني من سورة البقرة كله أحكام: أحكام الصيام والقصاص والأسرة وتحريم الربا وأحكام الدين والنفاق. ربنا قبل ما يقول لنا الأحكام،بيقول لنا انتوا هتبقوا مين فى التلاتة... _ هتبقوا زى آدم ( تطيعوا وتعصوا ) ولا زى بنى اسرائيل "قالوا سمعنا وعلينا" ولا زى إبراهيم أطيعوا تمام الطاعة. علشان كده الجزء الأول كان فيه قصة الثلاث خلفاء وبعد كده الجزء الثاني الأحكام والتشريعات. وفى الآخر قوله تعالى : "لله ما فى السموات وما فى الأرض وإن تبدوا ما فى أنفسكم أو تخفوه يحاسبكم به الله" لما نزلت الآية راح الصحابة للنبى صلى الله عليه وسلم وبكوا يارسول الله أمرنا بالصلاة والصيام والزكاة فصبرنا وامتثلنا لأننا كلفنا بما نطيق ولكن هذا تكليف بما لا تطيق فقال النبى صلى الله عليه وسلم لا تكونوا كبنى اسرائيل مع موسى قالوا سمعنا وعصينا ولكن قولوا سمعنا واطعنا، ف لما قالوها وأكثروا منها مدحهم الله بقوله تعالى: "وقالوا سمعنا واطعنا غفرانك ربنا وإليك المصير" ونزل التخفيف من الله عنهم بقوله : "لا يكلف الله نفسا إلا وسعها لها ما كسبت وعليها ما اكتسبت" والختام بدعاء الصحابة لله بقولهم: "ربنا لا تؤاخذنا إن نسينا أو أخطأنا" يعنى بلاش تعاملنا يارب زى آدم لو عملنا زيه ف نسينا التكليف أو اخطأنا ف تطردنا من جنتك. "ربنا ولا تحمل علينا إصرا كما حملته على الذين من قبلنا" يعنى متعاملناش يارب زى بنى اسرائيل، الإصر هو الشئ الثقيل على النفس لإن ربنا قالهم: "فتوبوا إلى بارئكم فاقتلوا أنفسكم" ••••••••••••••••••• _الشيخ فرج: فهمتوا يا اولادى = الحمد لله فهمنا ياشيخنا _الشيخ فرج: لسة فى اسئلة..! _إيمان رفعت ايديها والشيخ سمحلها تتكلم: هو الحجاب فرض ياشيخنا _الشيخ فرج: حد فيكم عارف ولا اجاوب أنا _أمل: ممكن أجاوب _الشيخ فرج: اتفضل _أمل: إيمان أنا شيفاكى لابسة الحجاب... ! هل انتى مفصولة عليه _إيمان: لا طبعا أنا إللى طلبت اللبسه _أمل: اومال السؤال فين بقى _إيمان: لو عايزة أقنع حد بيه او لو حد سألنى هل هو فرض أم لا اقوله ايه _أمل: ممكن تقوليلى الحجاب ذكر فى سورة ايه... ! _ايمان :سورة النور _أمل: أول آيه ف سورة النور بتقول ايه..؟ _إيمان: "سورة انزلناها وفرضناها" _ أمل: يعني اي أوامر ربانية في السورة دي فرض اذا الحجاب فرض لانه ذكر ف السورة وربنا بيقول: "وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ ۗ وَمَن يَعْصِ اللَّهَ وَرَسُولَهُ فَقَدْ ضَلَّ ضَلَالًا مُّبِينًا" يعني انتي مفيش قدامك خيارين اصلا هو طريق واحد اسمه "سمعنا واطعنا" #أمل_محمد