كيف تطور نفسك في مجال الكتابه - ازاي تحسن من مستواك في كتابه الشعر، الاسكريبت، القصص القصيرة

 

صديقتي بقلم شهد مراد "' الدنيا بتنور لمَ تقدر تخطف منها صاحب يسند روحك وقت وجعك ويقوي قلبك لمَ تضعف."'

دخلت الكلية اللي بحبها "كلية فنون جميلة" وانهارده أول يوم ليا في الكلية. علي قد ما كنت فرحانة إني هدخل الكلية دي وأدرس الحاجة اللي بحبها علي قد ما كنت خايفة ومتوترة جداً من إني أكون وسط ناس جديدة وأول مرة أعرفها، خايفة من إن محدش يتقبلني، خايفة من نظرة السخرية اللي بشوفها في عيون ناس كتير ومرعوبة من نظرة الشفقة اللي بشوفها في عيون ناس أكتر.

أصل أنا مش بسمع ولا بتكلم. اتولدت كده بعاني من الصم والبكم.بتعامل مع الناس بالإشارة وبقدر أقرأ الشفايف كويس. ‏كنت داخلة المحاضرة وفجأة لقيت بنت خبطت فيا. ‏_ أنا أسفة. ‏ابتسمتلها وكنت همشي لقيتها بتمدلي ايديها. ‏_ أنا ندي، أول يوم ليا في الكلية. ‏مديت ايدي سلمت عليها وابتسمت بردو وسكت.أصلي مكنتش حابة أتعرف علي حد ولا حد يعرف بحالتي لأني مش عايزة أشوف نظرات السخرية والشفقة من تاني. ‏_ أنتِ بقي اسمك ايه؟ ‏للحظة فكرت إني مجاوبش وأسيبها وأمشي بس فيه إحساس من جوايا كان بيقولي إن البنت دي كويسة وأنها هتكون قريبة مني. حبيتها من أول ما شوفتها. ‏كان معايا كشكول مكتوب عليه اسمي فشاورت لها علي اسمي"شهد". ‏_ اسمك شهد، بس هو إنتِ ليه مش بتردي عليا. ‏حسيت إنها مختلفة فقررت أقولها. ‏اتواصلت معاها بالإشارة بمعني إني مقدرش اسمع ولا اتكلم. ‏_ أنتِ قصدك إنك مش بتقدري تتكلمي ولا تسمعي؟! ‏هزيت راسي بمعني أيوة. ‏_ بس إنتِ بتقدري تعرفي أنا بقول إيه ازاي؟!! ‏استخدمت الإشارة وعرفتها إني بقدر أقرأ الشفايف. ‏فابتسمت ودخلنا المحاضرة مع بعض. وبعد وقت قصير جداً بقينا أصحاب. هي أول واحدة مشوفش في عنيها إنها بتتعامل معايا كويس شفقة، قدرنا نفهم بعض بسرعة وهي اتأقلمت وبقت بتفهم لغة الإشارة اللي بستخدمها، هي الوحيدة اللي كان ليا علاقة بيها من الكلية، كنت بتجنب أتعامل مع أي حد تاني غيرها. وفي يوم كنا في كافيتريا الكلية بنذاكر وندي قامت تجيب قهوة، أصل احنا منقدرش نفتح كتاب من غير مايكون معانا قهوتنا. كنت قاعدة لوحدي مستنياها شوفت أربع بنات واقفين قصادي بيبصوا عليا وبيضحكوا، ولأنهم ماكانوش بعيد عني قدرت أقرأ حركة شفايفهم وعرفت إنهم بيتكلموا عليا وبيتريقوا. حبست دموعي في عيني؛ لإني متعودة أظهر قوية وعمر ما حد قدر يشوف دموعي. لقيت ندي وقفت قدام البنات دي فشوفتها من ضهرها وحركات ايديها بتدل علي إنها بتتخانق. قربت عليهم وفهمت إنها سمعتهم وبتتخانق علشاني.مسكت إيديها وحاولت أخدها وامشي بس هي رفضت. _ سبيني يا شهد. لو أنتِ هتسكتي عن حقك أنا مش هسكت. سابت إيدي وبصت للبنات. _ ياريت كل واحدة فيكم تخليها في حالها وملهاش دعوة بشهد، ياريت تسيبوها في حالها، وأي واحدة فيكم هتجيب سيرتها أو تتكلم عليها أنا اللي هتصرفت معاها، أنا مسمحش لأي حد إنه يتكلم عليها ولا حد يجرحها بكلمة. وبعدين إنتو بتتريقوا علي حاجة ربنا خلقها، هي ذنبها إيه؟! إنها اتولدت لقت نفسها كده. ده قضاء ربنا، حطوا نفسكم مكانها كده، مفيش واحدة فيكم هتقدر تتحمل اللي هي اتحملتوا، هي إنسان كويسة جداً بس ذنبها إنها اتولدت في مجتمع مريض مش بيقدر حالتها ولا الناس اللي زيها. مع إن الناس دي أحسن مليون مرة من أي حد طبيعي، هي أحسن من أي واحدة فيكم، هي ربنا خلهقا مش بتقدر تتكلم ولا تسمع لكن انتم تقدروا، عملتوا ايه بقي بالنعمة اللي ربنا أنعم عليكم بيها دي؟! بتتكلموا علي الناس وتجيبوا في سيرتهم وخلاص، بتتريقوا عليها وتجرحوها بالكلام، هي أحسن من أي حد فيكم علي الأقل هي عمرها ما جرحت حد بالكلام زيكم. يلا يا شهد. مسكت إيدي ومشينا.

دموعي نزلت وحضنتها. ودي كانت أول مرة حد يشوف دموعي، بس كانت دموع الفرح. أنا طول عمري لوحدي والناس بتبعد عني، هي الوحيدة اللي قبلتني زي ما أنا. هي أول وأحسن صديقة عرفتها علشان معاها بكون بطبيعتي ومش خايفة ولا حاسة إني قليلة. _ إنتِ بتعيطي ليه دلوقتي؟! أنا أخدت حقك منهم. شاورت وقولتلها إن دي دموع الفرح وأن أنا فرحانة علشان هي دافعت عني، وإنها قبلتني كده عكس الناس التانية. قولتلها إني عمري ما كان عندي صُحاب وأنهم كانوا بيبعدوا عني، وإني كنت علي طول لوحدي. _ أنتِ مش هتكوني لوحدك تاني علشان أنا معاكِ. بعدها علاقنا بقت أقوي. وبقيت بخرج وأتفسح وأتعامل مع الناس عادي وبعمل كل حاجة نفسي فيها، مبقتش أخاف من نظرات الناس ليا، بقيت أحس إن أنا شخص طبيعي؛ لأن طول ما هي جمبي أنا مبسوطة ومش خايفة. "الصداقة اللي بجد إنك تلاقي صديق يتقبلك بعيوبك قبل مميزاتك، يدافع عنك ويرد غيبتك. صديق يسندك ويكون قوتك يوم ما تقع والدنيا تيجي عليك. ياخد بإيدك لقدام، يديك أمل في بكره لما تيأس، يثق فيك ويحيي أملك في نفسك يوم ما تفقد أملك في روحك، ووقت متحتاجه تلاقيه معاك وسندك حتي لو معندوش وقت هيخلق الوقت ويسيب أي حاجة علشانك. بتكون علي طبيعتك معاه ومش مضطر تتصنع، معاه بتشيل الستارة اللي بتحاول تداري بيها عيوبك علشان هو متقبلك بعيوبك، بيحاول يصلح فيك العيوب دي. صديق واحد يغني عن العالم كله بس لو صديق بجد. ممكن يكون حواليك أصدقاء كتير ووقت ما تحتاجهم مش هتلاقيهم وهتكون وحيد. بعكس شخص تاني عنده صديق واحد بس معاه في كل حاجة وعمره ما خلاه يعرف معني الوحدة. الأصدقاء بيبانوا في المواقف الصعبة والحزن. سيبك من لمة الصحاب الكدابة وركز وشوف مين صاحبك بجد.

"' الدنيا بتنور لمَ تقدر تخطف منها صاحب يسند روحك وقت وجعك ويقوي قلبك لمَ تضعف."' " # شهد مراد.