علم الفضاء -الثقوب الكونية السوداء والبيضاء والثقب الدودي - بقلم سهيلة ممدوح- اعضاء زي الكتاب ما قال
#الثقوب_الكونية
علم الفضاء هو من أقدم العلوم التي تم التعرف عليها،لكنه يعتبر من أقل العلوم التي تم الوصول إلي خابياها،اهتم بيه كتير من المؤلفين والمخرجين في إنتاج أفلامهم زي فيلم Black hole وفيلم interstellar والمقال ده ليه علاقه بالعملين دول لأني هتكلم عن الثقوب الكونية.
*الثقب الاسود*
بكل بساطه أن لكل نجم عمر افتراضي، والمكون الاساسي للنجم هو الهيدروجين اللي بتندمج ذراته مع بعضها وبينتج عنها غاز الهيليوم اللي بينتج عناصر أثقل، وبيحافظ النجم علي كتلته من خلال التوازن بين القوة الناتجة عن الإندماج ده وقوة التجاذب بين العناصر والذرات المكونة له، ولما بيحصل خلل ف التوازن ده بينتج عنه إنفجار هائل بيسمى ب"سوبرنوفا" مخلفا وراءه مركز النجم العملاق شديد الكثافة وبيتحول لثقب اسود يمتص أي حاجه تقرب منه حتي الضوء!
المرة الوحيدة اللي تم رؤية فيها ثقب أسود كانت عام2019 لكن الجدير بالذكر هو أن الثقب لم يتم تصويره بالضوء المرئي بل تم تصويره بالأمواج الراديوية حيث تم تشكيل الصورة التي بالأسفل من قياس الأمواج الراديوية ثم معالجتها بالحواسيب والعلماء هم اللي اختاروا اللون البرتقالي اللي بيحيط بالثقب ليدل علي شدة قوة الطاقة المنبعثة منه،والسؤال اللي سئلوه كتير:هل ممكن الثقب ده يبتلع الارض؟!، والحقيقه هي أن الثقب ده بيقع في مجره تانية أصلا اسمها"M87"، لكن ده مش معناه أن مفيش ثقب في مجرتنا لان العلماء اكتشفوا وجود ثقب في قلب المجرة اسمه"Sagittarius A" لكن بردو صعب أنه يبتلع الارض لأنه بعيد جدا عنها، لكن الممكن هو سقوط مركبة فضائية أو رائد فضاء فيه، فلو أنت نفسك تكون رائد فضاء ركز معايا كده اي اللي هيحصلك، أولا الثقب هيسحب جسمك والفرق بين راسك و قدميك هيساهم بإستطاله الجسد زي العلكه او الباستا وف الاخر هتبقى عبارة عن جزيئات دون زرية يعني هتبقي ولا حاجه، ودي إفتراضية اسمها"تأثيرات المعكرونه"، إلا لو أنت محظوظ ووقعت في ثقب كبير فالجاذبية هتبقى قليلة والوقت والزمن هيتجمدوا وممكن تصبح خالدا ما يتيح لك رؤيه الماضي والمستقبل،أو أنك تخرج من الثقب الأبيض!
*الثقب الابيض*
"إن وجد الشر لابد من وجود الخير" جمله ممكن تسمعها ف الافلام والكرتون لكن لازم تتعود تسمعها بعد كده عن الفضاء، فلو افترضنا أن الثقب الاسود هو الشر فيجب أن يكون الثقب الابيض هو الخير، والعلماء أخدوا الفرض ده كحل لقوانين النسبية بحيث أنه في وجود ثقوب سوداء لازم يبقي في عكسها وهي الثقوب البيضاء، وممكن كمان أن الزمن يكون معاكس فيها للثقوب السوداء.
لغاية دلوقتي لم يتم وجود أي ثقب أبيض في الحقيقة، لكن العلماء وضعوا توقعات لكيفية عمله، البعض ظن أنه بيمتلك قوة قادرة علي إبعاد أي جسيم يقترب منه بحيث لا يمكن لأي شئ عبوره، يعني لو دخلت سفينة فضائية في نطاقه فالطاقة المنبعثة منه كفيلة أنها تدمر السفينة حتي لو كانت قادره علي تحمل أشعه غاما!!
وفي وجهة نظر تانية قالت أن الثقب الأبيض ممكن يقوم بتصريح الطاقة والمواد الممتصة من قبل الثقب الاسود، وفي الحالة دي الثقب الأسود مش هيكون مدمر لأنه هينقل الحاجو اللي امتصها في مكان أخر وهو احتمال ضعيف.
ومع رغم أن دي مجرد افتراضيات لكن الثقب الاسود بردو كان مجرد افتراضيات قبل العثور عليه، لذلك اظن أن في احتمال كبير لوجود الثقوب البيضاء.
*الثقب الدودي*
وجود عالم تاني غير عالمنا هو شئ مشوق جدا حتى لو الوصول ليه حاليا صعب لكن بالتأكيد بمرور الزمن هيجي أجيال تكتشف العالم الأخر ده والحاجة الوحيدو اللي ممكن تساعده ع كده هو "الثقب الدودي".
لم يظهر الثقب الدودي إلى الآن إلا في معادلة أينشتاين النسبية فقط، أي أنه لم يتم اكتشاف أي ثقب دودي حتى هذه اللحظة!، لكن العلماء وضعوا توقعات لشكل الثقب وقالوا أنه عبارة عن ممر زمني عبر الزمكان"Space time"، ويحتوي الثقب علي فمين وحنجرة شريطية مستقيمة يمكنها الالتفاف وتصل بين الفمين الكروين معا، لو تم اكتشاف ثقب دودي هتبقى حاجه عظيمه جدا، لأنه يقدر علي اختصار رحلات طويله عبر الكون لكن ممكن تواجهنا شوية مشاكل وهي أن حجم الثقب ممكن يكون من١٠_٣٣سم ومع ذلك فمع توسع الكون مش بعيد أنه يتمدد ويكبر حجمه، لكن المشكلة الحقيقية هي ثبات او استقرار الثقب لانه ممكن ينهار بسرعة، لكن بعض العلماء بتعتقد إننا هنحتاج نوع مادة غريبة لتثبيت الثقب ليظل مفتوحا لكن لم يتم اكتشاف تلك المواد حتى الان.
لكن مش معني الكلام ده انه ملوش اضرار ومخاطر أان هناك توقعات أن تلك الممرات ممكن تجيب معاها الكثير من المخاطر زي الانهيار المفاجئ والأشعاعات العالية حتى التعرض لمواد غريبة في الفضاء، لكن في رأيي أن الموضوع يستحق المجاذفه!
- تقدروا تنضموا لينا ولفريق زي الكتاب ما قال من خلال :
- رابط البيدج الخاص بينا على الفيس بوك
- أو من خلال جروب الفيس بوك الاول زي الكتاب ما قال
- أو من خلال جروب الفيس بوك الثاني شخابيط الكوكب الازرق
- أو من خلال مدونة زي الكتاب ما قال على بلوجر
- أو من خلال قناه اليوتيوب زي الكتاب ما قال
- 👋
- مع تحيات إدمن زي الكتاب ما قال 💙
عظمه بجد ربنا يبارك فيكي ويحفظك
ردحذف