حقيقي اسلام عمره ما فشل يوصف الحزن جوانا لكن المره دي الوصف كان صعب اووي

ربنا أفرغ علينا صبراً عشان القلب أصبح هش وجودنا فى الحياه إبره وغرقانه فى بحر القش بعشم نفسى بوجودك.. تغيبى. لنفسى أقول معلش ما بردو الحجه للغايب أكيد بتقضى كام مشوار تعالى عشان أنا فعلاً عملت عليا ألف حوار تعالى عشان هعوز رأيك فشئ محتاج أخدله قرار تعالى و بابا فى عنينا ومش هنجادله اى كلام تعالى عشان يوماتى امى بتغرق فالدموع جداً لحد ما تتهلك و تنام حقيقى الوضع مش هين و شوقنا لحد مات قاتل عملنا الأكل من بدرى فلو هتغيبى مش واكل منابك لسه متعان لك وهدومك لسه مغسوله صحيح مش واخد الحقنه شوفى لى بدلها كبسوله و هاتى لإيدى أى علاج عشان من مُده مكسوره وبلاش لو جايه ع فجأه نخض الحجه و نخبط ياشيخه حرام عشان فعلاً رُكبها ساعتها بتخبط و هى يادوب بتخدمنا ماهيش حمل الهزار منا فإهدى عشان دى لو وقعت ماحدش غيرها هيشيلنا ومش هنلاقى مين يطبخ و أيوا تعالى يلا عشان هأتيجى تروقى المطبخ و أوضتى كمان هتتظبط ونسهر بردو طول الليل هزار للصبح و نخبط و نتمايل و نتحايل و نتدلع و نتنطط وأتعصب تبُصيلى فأهدى و أحن تعالى عشان أنا شايفك و سامع ضحكتك بترن تعالى يجوز عشان بنتك يوماتى بتطلبك و تزن تقول ماما.. أقول جايه! تقول! إزاى وراحت فين؟ أخُدها فحُضنى وأنا عاجز أجيب لها زيك اُم منين! وإيه يغنيها عن حُبك ده كان الكون فعز البرد سحاب أسود وبرق ورعد وكإن الشمس دى حضنك أسلم بس فأتدفى مشيتى إتقلبت الكفه كإن الدنيا بتعيط مطرها حداد ع بُعدك قتلنا الحُزن من بعدك تعالى خلاص وأنا واعدك هتمشى وكل شئ هيمُر تعالى وكل جاى هيسُر تعالى و أيمنات بالله لا بكره الصبح متجوز وأحقق هدفك المطلوب تعالى بقولها وأنا عارف بإنى المره دى مغلوب وبإنك بردو مش جايه وإنه خلاص قدر مكتوب....... اسلام وردة