بقلم ايه فتحي - من قصص اعضاء زي الكتاب ما قال
-إيه يا زميلي، عامل إيه؟
=زميلي!، يا يوسف والله أنا بنت بطل تعاملني علي إني ولد صاحبك.
-إيه يابا زعلت ولا إيه، ما إنت عارف مش بعرف أتكلم غير بلغة المذكر بحكم شغلي يا سارة، متزعليش خلاص، آسف يا ستي.
=ولا يهمك يا چو، بس إيه النور ده، حضرة الظابط يوسف عندنا، يا مرحبا يا مرحبا.
-لا بقولك إيه وحياة خالتك كفاية تريقة أنا لسة راجع من عملية قبض علي مجرمين، وبدل ما خالتك تقابلني بحلة محشي وبطاية كدة، قابلتني بصور لعرايس وعاوزاني أختار.
بألم= احم واخترت؟!
-هو أنا لو اخترت كنت هاجي ابات هنا، المهم أنا طالع أنام في أوضة حازم وابقي عرفي خالتي بقي.
"السكوت أوقات كتير بيكون أبلغ من الكلام، بحبه من صغرنا بس هو مش شايفني غير بنت خالته الصغيرة وبس، زميله اللي بيحكي له مشاكله ويفضفض معاه، أول مرة حكي ليا سر من أسراره كان عنها وعن جمالها وأد إيه بيحبها ومستني اليوم اللي يخطبها فيه، بس للأسف من سوء حظه أو من حسن حظي اتخطبت لغيره، يومها جالي وعيط قصادي ودي كانت أول مرة أشوف دموعه من بعد موت والده، وتقريباً هتبقي الأخيرة!، من بعدها بقي إنسان تاني بيفني عمره في الشغل وبس لحد ما بقي عنده32 سنة ونسي الحب ونسيني، ميعرفش إن فيه واحدة مستنية كف إيده عشان ترسم خطوطها فيه، مستنية ضحكة منه عشان تعرف تعيش وتكمل حياتها اللي واقفة عشانه، دفنت نفسها بالحياة في صورة ولد، لبس ولد طريقة ولد عشان أفهمه واسمعه، بس ولا مرة جرب يسمعني ويعرفني من جوا، ولا مرة!"
-زعلانة من إيه؟
=مفيش يا ندي
-اممم عليا برضه، طب لو مش هتحكي لبنت خالتك ومرات أخوكِ أحكي لأختك، ولا استني مهو أكيد أخويا المهزأ هو السبب، ماما قالتلي إنه جه هنا.
ببكاء= والله زهقت وتعبت منه يا ندي، إيه هو أعمي للدرجة دي، مش شايف حبي له، اللي كل يوم بيكبر وقلبي بيضعف بسببه، الناس كلها عارفة وفاهمة وهو لا، أو فاهم بس بيستهبل.
-طب بس، اهدي بس، بصي يا سارة أنا لو أعرف إن مشاعر أخويا ناحيتك مش هتتغير أو هيحبك في يوم كنت قولتلك شوفي حياتك وبلاش ظلم لنفسك، بس أنا عارفة إنه هيجي يوم ويحبك، هو بس عاوز اللي يداويه من حب مكنش له، وعاوز يشوفك بجد، يشوف البنت سارة مش زميله سارة.
=قصدك إيه؟
-والله إنتِ فاهمة قصدي كويس، ممكن أعرف إيه اللي إنتِ لابساه ده!، بنطلون وتيشيرت زي الولاد، لا ومش بس كدة دول ألوانهم كئيبة، وطريقة كلامك وهواياتك غريبة مش هوايات بنت خالص، البنت اللي المفروض تكون أول صفاتها الرقة والحياء والهدوء، كل ده مش عندك الله يحفظك يعني.
=نعاااام، مالها هواياتي وطريقتي يا ست ندي، وبعدين مش هغير من نفسي عشان حد، لو هيحبني كدة يا أهلا مش عاوز خلاص مع السلامة.
-لا أبداً، هوايات قمر، ملاكمة ومبارزة بالسيف، تصدقي عندك حق، مع السلامة فعلاً ، خلي ياسمين بنت عمي تخطفه منك، هي ما هتصدق أصلاً، خليها تاخده.
=إيه ياسمين مين يا بنت خالتي، ما إحنا بناخد وندي بشكل ودي أهو، اللهي ياخدها قطر بالحضن، ده أنا اقتلها.
-أيوة كدة نعقل وتسمعي كلامي، بصي بقي.
"مفيش مانع من شوية تغيير بسيط كدة، ارميلي يا ابني كل البناطيل دي ونجيب بدالها دريسات، وتكون ألوان بناتي اه عشان ميقولوش علينا معقدين، أيوة ونهتم بالبشرة بشوية ماسكات كدة وندلعها، وايه ده كمان، أتكلم بهدوء وصوتي ميتسمعش، ودي أعملها ازاي؟!، يتها نيلة اللي عاوزة جواز، أنا غلطانة"
-فهمتي هتقولي أي وإنتِ بتصحيه، واه خليكي تقيلة كدة متبقيش خفيفة خليه يسأل إنتِ اتغيرتي ازاي.
=خلاص فهمت، من الصبح بتحفظي فيا هي كميا يعني؟
-لسانك ده هيوديكِ في داهية وهيبوظ كل حاجة.
=لا ياسطا متقلقش، هخلي كل الأمور تحت السيطرة يابشا.
-اسطا وباشا، الله يخربيت اللي جعلك صحفية في الحوادت يا شيخة، قومي يا بت من جنبي قومي، والله حلة ولاقت غطاها إنتِ وهو.
"تتعاملي بهدوء، تتكلمي براحة، تبصي في الأرض، تضحكي من غير صوت، مش عاوز DVD بالمرة!"
-صباح الخير يا شاطرة، أمال خالتي وسارة فين؟
بهمس=تنطس في نظرك يا بعيد، إيه أنا اتغيرت للدرجة دي!
-ايه بكلمك، مش إنتِ جارتهم ولا إيه؟
=إيه يا يوسف، ده هو اللبس اللي غيرته.
-ساااااارة!!، إنتِ دي!
=لا شبحي يا يوسف، هو انا اتغيرت كتير يعني؟
-والله لو قولت180 درجة هيبقي قليل، بقيتي بنت يا سارة بجد، أنا معرفتكيش والله.
بحزن=هو أنا كنت وحشة قبل كدة يا يوسف؟
-انتِ عمرك ولا كنتِ ولا هتكوني وحشة، ومين غيرك يبقي الحلو؟، بس كان لازم لك درس كدة في الأنوثة والظاهر ندي أختي قامت بالواجب، هشوفلك عريس بقي يا حلو.
=عريس" رجعولي البناطيل تاني وارموا الدريسات دي من وشااااااااي، أشوف فيك يوم يا يوسف يا أبن خالتي.
=بقولك جِبلة، اخوكي جِبلة، بقالي شهرين بلبس دريسات ومغيرة في شكلي وطريقتي ومبقتش اهتم بيه وهو ولا هو هنا.
-بقولك ايه يا سارة، عاوزة أسألك سؤال، إنتِ لما اتغيرتي كان عشان يوسف صح!، بس بقيتي أحلي وأحسن لنفسك مش له، وده اللي كنت عاوزة أوصله ليكِ ،تبقي حلوة تبقي بنوتة لنفسك مش لحد، تحسي بأنوثتك لنفسك مش لغيرك، إنتِ في الحقيقة اتغيرتي عشان نفسك مش عشان أخويا، أنا عارفاكِ عنيدة وقوية لو مكنيش عاوزة تتغيري ولا ألف واحدة زيي كانت هتعرف تقنعك.
=.............
-سكتي يعني؟!, قولت حاجة غلط؟
=بالعكس كل كلامك صح يا ندي، أنا حطيت يوسف شماعة اعلق عليها تغيري بس أنا فعلاً كنت عاوزة أتغير وابقي حلوة في عين نفسي قبل الغير.
-بس وده اللي كنت عاوزاكِ توصلي له، يوسف حبك أو لا ده نصيب بس إنتِ عملتي كل ده عشانك، عشان سارة فاهمة؟.
=فاهمة يا أجمل ندي في الوجود.
"كل بنت جوانا مزروعة فيها غريزة الأنوثة، وانها تبقي حلوة في عيون الكل، بس فكري انتِ حلوة في عين نفسك ولا لا؟، لو إنتِ راضية عن نفسك وواثقة فيها ده يكفي والله يكفي ويغور العالم بكلامه وآرائه وإنك سمرا أو عندك حبوب أو نمش وغيره، حبي نفسك وقدريها هتلاقي الكل حبك وعرفك علي حقيقة قلبك"
-هدوءك ده مش مطمني، اتغيرتي أوي يا سارة.
=الكل بيتغير يا يوسف، فيه اللي بيعرف نفسه بعد فوات الأوان ومش بيلحق يغير وفيه المحظوظ زيي، عرف قيمة نفسه ودلوقتي بيحبها وبيعرفها وبيحاول تخليها تسامحه، بعتذر لنفسي يا يوسف علي حاجات كتير غلط ارتكتبتها في حقها.
-الحقيقة مش فاهم حاجة.
=من أمتي كنت بتفهمني، الأنانية وحشة يا يوسف صح؟، إنك تفضل تاخد من مشاعر وطاقة إنسان من غير ما تعطي له جزء من حقه يبقي ده غلط صح؟، لما تكون عارف بمكانتك عنده واد ايه هي عظيمة بس إنت تحطه في مكانة أقل من العادية يبقي حرام صح؟، لما تبص في عيونه وتلاقي الحب والدفء والحنان وتقابله إنت بالبرود والجمود يبقي ظلم صح؟، كل المشاعر دي عيشتها بيني وبين عيونك وقلبك وأنا بحبك وإنت مش داري، أو يمكن عارف بس مش عاوزني، مش هقدر أقول الذنب كله عليك، أنا عليا وزر اكبر بس الحمدلله إني فوقت.
-سارة، انا يعني،،،،،،
=مش عاوزة أسمع حاجة صدقني، كفاية اللي عيشته.
"اظن كفاية تقليل كرامة واستهلاك مساعى مع ناس متستاهلش، ناس بيتعمدوا يجرحوك كل ما الفرصة تسمح، إيه نفسك رخيصة عندك؟!، نفسك أغلي ما تملك، غليها وعززها وارفعها لأعلي مكانة وخلي الكل يعرف قيمتها."
"عدي 6شهور حاولت علي اد ما اقدر متجمعش معاه في مكان واحد، جايز ده كان عقابه وعقاب ليا أنا كمان، عرفت نفسي أكتر وحبيتها أكتر، بقي عندي هواية اسمها القراءة،عظيمة الهواية دي ازاي مكنتش بحبها من زمان!، ماما قالت ليا إني خالتي فاتحتها في موضوع جوازي من يوسف بس أنا رفضت رغم حبي له بس شيئ جوايا خلاني أرفض واوفق علي العريس اللي بابا جابه ليا، قولت أجرب وماله، خليني اخرج من دوامة حب مفيهاش أمل لعلاقة جديدة جايز تستمر.
-يلا يا سارة، العريس مستني.
=حاضر يا ندي.
-ازيك يا زميلي،،،،،
بصدمة=يو، يوسف!!، بتعمل اي هنا.
-بصراحة، معجبنيش عريس الغفلة، فـ مشيته هو وأهله وقعدت أنا مكانه، أصل محدش هيليق عليكِ غيري ولا إيه رأيك.
=ده جنان رسمي،وانا مش موافقة عليك يا حضرة الظابط، وزي ما مشيته رجعه دلوقتي يلا.
-بعد ما المأذون يكتب الكتاب حاضر، هو برا أهو مع عمي،،،،
=اي؟؟؟
-وربي وما أعبد لو ما وافقتي ع الجواز لأكون حابسك في سجن انفرادي لحد ما تقولي حقي براقبتي.
"وفي غمضة عين بقيت مراته، طبعاً موافقتش عشان خايفة منه لسمح الله ولا حاجة،،،، كنت مرعوبة بس."
=إيه بتقرب كدة ليه؟، ابعد لو سمحت.
-قولتيلي عاوزني أرجعه زي ما طردته؟
=أنا قولت كدة، طبعاً لا ، في داهية المركب اللي تودي يعني،،،
-وقولتي عمرك ما هتقبلي تجوزيني.
=معلش عيلة وغلطت بس ابعد بقي،،،،
-اه صحيح،ندي قالتلي إنك بتقرأي لحنان لاشين صح؟
=اه ليه؟؟
-اممم طب أيجيدور
=ها، ليه؟
-عشان إيكادولي
=إيه،،،،،
-إيه إنتِ، بقالي اسبوع بحفظ فيها.
=وأنا إيكادولي من زمان.....
"وإني اخترتك بين الزحام فلا تتركني"
أزال المؤلف هذا التعليق.
ردحذف