"حياة من نوع آخر " قصة قصيرة بقلم فاطمة عاطف
"حياة من نوع آخر "
نور : ماما أنا طالعة السطح أشم هوا شوية ونازلة
أميرة : ماشي يا حبيبتي اطلعي
أخدت تليفوني والهاند فري وطلعت كانت حوالي الساعة 9 بالليل، طلعت وكعادتي قعدت على الكرسي وشغلت الهاند فري وحطيته في ودني وسرحت في جمال السما وهدوءها، وبالذات أني بحب لونها وكمان عندي شغف أني أعرف معلومات أكتر عن الفضاء والكواكب والنجوم، فضلت شوية مركزة في السما وأنا باصة عليها شوفت نجمة مختلفة عن باقي النجوم ومنورة وظاهرة في السما حسيتها بتكبر وبتقرب أووي، وبتظهر بوضوح وبعد شوية حسيت بقلق دي نجمة مش طبيعية وأكيد مش طيارة، اتحركت من مكاني وفتحت الموبايل عشان اصورها بس الغريب اني لما فتحت الكاميرا و وجهتها ناحيتها ملقتش حاجة في الكاميرا كانت السما بس اللي ظاهرة، كنت مستغربة جدًا لغاية ما قربت اكتر واكتشفت إنها مش نجمة،دي حاجة شكلها دائري وبتطلع ألوان غريبة وقرّبت جدًا لغاية ما نزلت في مكان بعيد عن بيتنا شوية استغربت جدًا من اللي حصل؛ لأن المكان ده مش مطار أو في حاجة مهمة في المكان ده، ده بيت مهجور من فترة كبيرة وبيقولوا أنه مسكون ومحدش ساكن فيه، أسئلة كتير في دماغي مش لاقيالها إجابة ومش عارفة أعمل إيه، نزلت الشقة ودخلت أوضتي وبدأت أفكر بهدوء في اللي شوفته، بس أنا فاكرة أني شفت شكل الكائن الغريب ده وأنا ببحث عن حاجة تخص الكائنات الفضائية والكواكب التانية اللي عليها كائنات تانية عايشة.
أثناء بحثي لقيت صورة تشبه الجسم الغريب اللي شوفته أو هو، فتحت الصورة وبدأت أقرأ المعلومات اللي مكتوبة عنها.
مركبة F. A. Y من مجموعة شمسية تدعي (Andromeda Galaxy ) هذه المجموعة تحتوي على العديد من الأقمار والكواكب ويوجد بها كوكب واحد يوجد عليه حياة، ولكن الحياة عليه لا تشبه الحياة على سطح كوكب الأرض، يوجد به سلالتان من الكائنات، كل سلالة تعيش في نصف من الكوكب، وفي كل نص تختلف الحياة عن الآخر، تواصل سكان الأرض مع سكان النصف الشمالي من الكوكب وهبطت مجموعة من تلك الكائنات على كوكب الأرض من عدت سنوات.
لقيت المعلومات دي على الموقع وأنا مستغربة وشغوفة جدًا إني أعرف معلومات أكتر عن الموضوع.
تاني يوم
نور : صباح الخير يا ماما، أنا نازلة رايحة الكلية
أميرة : صباح النور يا حبيبتي، ربنا معاكي ويوفقك
في الجامعة
نور : زين يا زين
زين : في إيه يا بنتي مالك، جاية مستعجلة أووي كدة ليه
نور : شوفت حاجة غريبة جدًا إمبارح وبحثت عنها وعرفت المعلومات دي
زين :.....
نور : إيه مالك!
زين : مندهش من اللي حصل
نور : أنا مبسوطة أووي إني شوفت حاجة زي دي وبفكر أروح أكتشف المكان ده
زين : تروحي! لا مينفعش تروحي وأنتِ بتقولي المكان مهجور
نور : خلاص تعالى معايا واهو نشوف ايه حكاية البيت ده
زين : أمري إلى الله، بس إزاي هنخرج عشان نروح البيت ده؟
نور : هقولك، هتصل ب ماما وأقولها أنك جاي تتغدي معانا وبعد الغدا نبقى نقولها نازلين نتمشي شوية ونروح نشوف البيت
زين : طيب، ربنا يكون في عونك يا خالتي على بنتك اللي شكلها هتودينا في داهية
نور : أنا هوديك في داهية، طيب يا سيدي شكرًا
اتصلت ب ماما وقولتلها أن زين جاي يتغدي معانا وخلصنا محاضراتنا ورجعنا البيت
نور : ماما يا ماما
أميرة : اديني يا حبيبتي حمد الله على سلامتك، أومال فين زين؟
نور : الله يسلمك يا ماما، في الصالة
أميرة : طيب يا حبيبتي هطلع اسلم عليه
زين : أزي حضرتك يا خالتي
أميرة : الحمد لله بخير يا حبيبي، يلا يا حبيبي قوم اغسل ايدك عشان الغدا
زين : حاضر
نور : تسلم ايدك يا ست الكل
أميرة : بالهنا والشفا
بعد الغدا
زين : بستأذنك يا خالتي هاخد نور وننزل نتمشي شوية
أميرة : ماشي يا حبيبي بس متتأخروش
زين : حاضر
نزلت أنا وزين واتمشينا لغاية البيت المهجور، البيت كان كبير وشكله غريب مش زي باقي البيوت، البوابة كانت كبيرة ومنقوش أشكال غريبة عليها، زين فتح الباب بصعوبة ودخلنا البيت كان مهجور وضلمة، بدأنا نتحرك بهدوء ومعانا كشافات، كل واحد دوّر في مكان بس الغريب إننا ملقيناش حاجة تدل إن في حاجة كانت هنا، أو حد؛ لأن البيت باين عليه إنه مهجور من فترة كبيرة ومتفتحش.
رجعنا البيت وكنت متدايقة إني معرفتش حاجة، بس ميأستش كان معايا كتب بتتكلم عن الفضاء والنجوم ووجود كائنات على كوكب تاني بس مش مكتوب تفاصيل عنهم، بس كان مكتوب إن مجموعة من الكائنات دي نزلت كوكب الأرض في فترة زمنية قديمة وكان في تواصل بين مجموعة من العلماء وبينهم في تحليل قطعة صخرية كبيرة بسبب احتوائها على مجموعة عناصر تدخل في صناعة بعض أنواع الأدوية المهمة.
ملقتش حاجة تاني تفيدني في الكتاب قفلته واتصلت على زين قولتله، فقالي هبحث على جوجل واشوف معلومات اكتر عشان الموضوع طلع مشوق، قفلت معاه وعدي كام يوم مفيش معلومات جديدة تفيدنا نعرف ايه ده أو نوصل ل سبب نزوله الأرض.
خلصت يومي وكعادتي طلعت السطح، بس طلعت بدري النهاردة عشان اهدي أعصابي شوية واغير مودي، حطيت الهند فري في ودني وغمضت عيني وسرحت... حسيت إني في مركبة فضائية ونزلت على كوكب غريب بس الغريبة أن في مباني هناك، وقفت على باب المركبة وفتحت الباب ولسه هخرج لقيت كائن شكله غريب واقف قدامي، شكله مش مختلف كتير عن هيئتنا ولكن شكل وشه غريب وملامحه غريبة... بس فوقت على صوت غريب في ودني غير الصوت اللي كنت مشغلاه فتحت عيني لقيت المركبة تاني ظاهرة في السما وبتقرب ونزلت تاني في نفس المكان.
#فاطمة'ة عاطف
تعليقات
إرسال تعليق
اكتب تعليق لتشجيعنا