خلود ناجي - كاتبة قصص قصيرة وعاشقة للادب العربي والاجنبي في لقاء خاص مع مجلة زي الكتاب ما قال
فتاة العشرين عاما- بنت من بنات عروس الصعيد- بتقرا وتدرس ادب انجلش وعربي- هنعرف منها الفرق بينهم- وما هي مقومات كتابة القصة- ومعلومات جميلة عن الادب العربي والاجنبي كل ده هنعرفه في لقاءنا اليوم مع الكاتبة/ خلود ناجي
بعد التحية/
-استاذة خلود هل بتكتبي سكريبات فقط - ام في بعض الخواطر تزين كتاباتك؟
=طبعا في خواطر بين كتابات القصص وممكن في داخل كل قصه
-كتبتي روايات قبل كده او شاركتي في معرض الكتاب؟
لا لكن ان شاء الله قريبا
أن شاء الله الأيام جايه وتكتبي
-بتكتبي من امته قصص؟
=من سنتين
فاكرة اول قصه كتبتيها كانت بتتكلم عن ايه؟
اه فاكرة كان اسكريبت بسيط جدا ومكنش عندي خلفية قوية في الكتابة زي دلوقتي بس فاكراه ونزلته علي الصفحة
كانت القصه بتتكلم عن ايه؟
اتنين ولاد عم عادي وبيكونوا أصحاب وبينهم خلافات ومقالب كتير وكده وهي بتتخطب لواحد وبعدين تكتشف أنها بتحبه وبيكونوا لبعض في النهاية ببساطة دي القصة
جميل جدا
سلمت
هل كل كتاباتك عن الحب والدراما ولا بتكتبي في ألوان مختلفه؟
في نوع تاريخي وواحد برا الصندوق بس مفيش نت كويس عشان ابحث عنهم في الصفحة
استاذه خلود هل الكتابة ودخولك ذلك المجال غير من شخصيتك؟
وتفكيرك؟
اه طبعا ... ساعدني كتير وأفكاري نضجت اكتر غير اني بسببها شخصيتي بقيت أفضل من الاول ومن خلال الكتابة بقيت اتخلص من الأفكار الكتيرة
مين قدوتك في الكتابه؟
هو انا مش بقرا صراحة كتير بس دكتورة حنان لاشين وأسلوبها
لاني أغلب قرأتي ادب انجليزي
هل كتاباتك يسودها الحقيقة ام الخيال ؟
ام هي مزيج من الخيال فقط او الحقيقة فقط؟
الحقيقة والأحداث الواقعية
ودا افضل من وجهة نظري عشان القارئ يستمتع وفي نفس الوقت يستفاد ولو بحاجة بسيطة من الاسكريبت
بتمدي قصصك بأحداث حدثت بالفعل؟
في قصة مرة كتبتها كانت أحداثها الأساسية حقيقة ... والباقي من تأليفي انا
ربنا يدوم إبداعك
امين يارب
طيب استاذه خلود ما هي مقومات او أساسيات كتابة القصه؟
الحبكة الفنية ، لازم يكون في مشكلة بتتناقش ولازم حلها ، بفضل دايما الأبطال يكونوا قريبين من الواقع بتاعتنا بنفس صفاتنا ، وتكون القصة ياريت فيها ابداع
لو شخص لسه بيبدأ جديد وحابب يتعلم من خبرتك في الكتابة عامة وكتابة القصص خاصة تنصحيه يبدا ازاي؟
هنصحه اول حاجة يقرأ كتير ودا هيساعده علي أن يكون عنده افكار كتير ، يقرأ لناس في سنه وفي نفس الوقت طبعا العمالقة للغة زي العقاد والمنفلوطي ، وعن كتاب عصرنا زي د/ حنان لاشين و/دعاء عبد الرحمن ويوسف الديموكي ...ودول افضل من وجهة نظري
اهم حاجة صبر وطول بال عشان يوصل
ويكتب ويكون عنده جرأة في أنه يتقبل النقد
ما شاء الله عندك معلومة بجد
سلمت ...بس دا لاني دراسة تكوين الرواية بالانجلش وأسباب النقد والنجاح وأمور هكذا
هو حضرتك بتدرسي آداب انجلش؟
اه
جميل
طيب بحكم دراستك هل يوجد فرق بين الأدب العربي والاجنبي؟
جدا طبعا
ممكن توضحيلنا؟
يعني هما بيكتبوا ومن خلال الرواية بتقدر تستوعب وتعيش معاهم العصر اللي هما فيه والرواية غرضها ايه وبدون ابتذال وكمان يعني مش بيكون في قصص حب يعني ...هو مثلا في قصص بتتكلم عن المرأة وازاي يعتبر مكنش ليها لزمة والكاتبة بتعالج دا وتوضح دورها ...وفي روايات بتناقش افكار نفسية هو في روايات كتير في ذهني بس مش عارفة ارتبها ، وبحب جدا حتة أنهم بيربطوا الأحداث برمز في قصصهم ،بس الشعر عندهم مش حلو زي الشعر العربي ، وطبعا مقدرش أتكلم عن الأدب العربي لاني مقراتش فيه كفاية بس انا بقرا في علم النفس لدكتور عادل صادق ودي الحاجة العربي الوحيدة اللي بقراها
ما هي طموحاتك في مجال الكتابة؟
أنا بشوف الكاتب صاحب رسالة وان الكتابة فن كبير ، فانا رسالتي للبنات واني اخليهم يحبوا القراءة وفي نفس الوقت أفكارهم تتطور للأفضل بعيدا عن الروايات اللي بتكون فيها تجاوزات كتير ، واني كتاباتي تكون حجة ليا مش عليا، بس طبعا لسه هتفرغ للقراءة والكتابة بعد مااخلص دراستي أن شاء الله
ربنا يحقق احلامك يا رب
امين يارب
مين اكتر حد شجعك تكتبي وديما كان دعم ليكي؟
اهلي هنا هم أكبر داعم ليا ومازالوا
وطبعا الناس علي صفحتي برضوا ليهم دور في كده
ربنا يحبب فيكي خلقه
امين
استاذة خلود في نهاية الحلقة ايه النصيحة تقدميها للشباب؟
انا بنصح نفسي قبليهم اننا نختار كويس الكاتب اللي هنقرله ونتابعه لانه هياثر علينا بأفكاره وكلامه ومعتقداته ، وان القراءة أكتر شي ممتع بيساعدك تغير مزاجك للأفضل وفي نفس الوقت تتسلي
ربنا يوفقنا جميعا
حقيقي سعدت بلقائي معاكي وكان لقاء مهم جدا مع شخصية مثلك
سلمت يارب وحقيقي فرحت جدا واتمنالكم التوفيق يارب ☺️
طيب هل قراءك ينتظروا ليككي عمل في معرض القاهرة القادم؟
اتمني باذن الله قريب يكون ليا عمل ورقي وأكون عند حسن ظنهم
ان شاء الله حضرتك قدها طبعا واسلوبك يسمح بكدا وقدرتك علي الكتابة تاهلك للرواية
باذن الله وشكرا على كلام حضرتك
وفي نهاية حديثنا يمكنكم متابعه الكاتبة وقراءة القصص من هنا خلود ناجي
اعداد وتقديم محمد حداد
تعليقات
إرسال تعليق
اكتب تعليق لتشجيعنا