كيف تطور نفسك في مجال الكتابه - ازاي تحسن من مستواك في كتابه الشعر، الاسكريبت، القصص القصيرة

بقلم  ساره مجدي - من خواطر اعضاء زي الكتاب ما قال

اى إنسان مهما بان قوى وصامد وصلب

اى إنسان مهما كان هو اللى بيبادر بالمواساة والسؤال

بتجيله فترات ضعف وتشاؤم مهما كان معروف بتفاؤله

بتجيله فترات انكسار وحزن وخزلان وخيبات أمل

والفترات دى بتكون من أصعب الفترات عليك ، لو انت شخص كتوم ، لو كنت متعودتش تتكلم عن اللى تاعبك ، لو كنت كمان شخص حساس ؛ لأنك فى الفترات دى هتفتكر كل موقف صعب مريت بيه ، هتفتكر كل اللى انت مخبيه جواك ، هتفتكر كل موقف بكيت فيه لوحدك فبيزيد انهيارك

ففى الفترات دى للأسف بتكون محتاج لكل شخص بتحبه

بتكون محتاج تعرف قيمتك عند كل الناس اللى حواليك

بتكون في أمس الحاجة للكلام الحلو والطبطبة

بتكون محتاج للى يفكرك بفترات قوتك ، يفكرك بصفاتك وخصالك الجميلة ومواقفك الجدعة ، يطمنك انه بيحبك وانه جنبك وان عمر ما رأيه هيتغير فيك

وهتبقى محظوظ جدا : لو فى ناس معاك بالطريقة دى من قبل حتى ما تضعف او تزعل او تكتئب

هما بيبقوا مبسوطين لما انت تكون مبسوط ،بيطمنوا لما يشوفوك مطمن

وانتوا كلكم مش عارفين : هو مين اللى بيستمد القوة والحيوية والاطمئنان من التانى ، مين فيكم اللى مسنود على التانى ، مين اللى مكمل فى طريقه الصعب علشان خاطر التانى ، مين اللى بيسعى يفرح التانى ، مين اللى مهتم اكتر

لان انتو الاتنين فاهمين بعض جدا ، ويمكن كل واحد فيكم بيكون فاهم الشخص التانى اكتر من ان كل واحد فيكم فاهم نفسه ، حتى لو كل واحد فيكم بيكتم كل لحظات الضعف دى جواه ، فى رابط واتصال عن طريقه كل واحد بيعرف ايه اللى جوة التانى

وبنبقى ممتنين جدا لكل شخص يهمه راحتنا وانبساطنا

لكل شخص حس اننا محتاجينله وقام بواجبه تجاهنا

لكل شخص اتحملنا فى أوحش حالاتنا فى الوقت اللى كنا لا نمتلك طاقة تكفى حتى انفسنا .......

#Sara_Magdy